Yr Oriel
Canfod Lefel y MôrStephen West
11 Mawrth - 13 Mai 2023
Artist sydd wedi byw a gweithio yng nghefn gwlad Canolbarth Cymru ers bron i 40 mlynedd yw Stephen West. Mae ei waith wedi cael ei arddangos yn rheolaidd yn orielau mawr Cymru, mewn arddangosfeydd amrywiol yn Lle Celf yr Eisteddfod Genedlaethol, ac mae wedi ymddangos ar restr fer nifer o wobrau a chystadlaethau yn y DU. Mae wedi gweithio drwy gyfrwng peintio, cerflunio, print a darlunio. Ar gyfer ei osodwaith newydd yn Oriel Mission, Abertawe, bydd ei ddarluniau, ar raddfa fawr, yn cael eu gosod i greu dilyniant o ddelweddau dramatig, pob un a naratifond heb adrodd stori.
Esbonia Stephen, "i fi, dinas ‘ddychmygus’ yw Abertawe, rhywle rydw i wedi ymweld â hi, ond sy'n bodoli’n fwy yn y dychymyg nag yn y cof. Ac mae Oriel Mission yn fwy o syniad o bosibiliadau na charreg a morter. Dyma ofod lle gall darluniau gael eu gwasgaru ar hyd y waliau a lle gellir uniaethu â phensaernïaeth unigryw y gofod anenwadol hwn ar lan y môr.
Mae fy ngwaith fel artist Cymreig wastad wedi ail-ddychmygu lle rydw i, drwy blethu breuddwydion gydag arsylwadau, fel y gall ystafelloedd ac adeiladau a natur droi’n rhywbeth arall mewn darlun neu droi’n ddarlun ynddo’i hun.
O edrych yn ôl ar y gyfres o ddarluniau rydw i wedi’u creu ers y 2010au, rydw i wedi sylweddoli bod fy ngweledigaeth yn ‘dirgaeedig’ yng nghanol Cymru. Adlewyrcha hyn rhywbeth am amgylchedd arbennig Dyffryn Banw, gyda'i ddyffryn llydan, y tri pentref a’r bryniau o’i gwmpas sydd wedi llywio awyrgylch fy narluniau.
Ond yn ddiweddar, mae fy ngweithiau wedi cael eu harddangos mewn cyfres o leoliadau glan môr, Y Bermo, Scarborough, Aberteifi, Tyddewi a Chaergybi, ac yn ddiweddar, mae’r môr wedi treiddio i hanner isaf y darluniau. Mae cymeriadau’n sefyll yn y dŵr neu ar y lan. Ac nid ymateb i arddangos fy ngwaith yn Abertawe yw hynny, ond y syniad taer bod y môr yn mynd i siapio ein bywydau fwyfwy wrth i newid hinsawdd ddwysau yn ystod y deng mlynedd nesaf.
Felly mae gwreiddiau’r arddangosfa hon yng nghefn gwlad canolbarth Cymru, ond o ran dychymyg, mae’n edrych tuag at ymyl dadleuol y môr. Y tro diwethaf i ni fesur, roedd ein drws ffrynt yn Nyffryn Banw union 600 troedfedd uwchlaw lefel y môr. Wrth symud y gwaith i Oriel Mission rydw i yn y broses o ganfod lefel y môr”.
Delwedd: Manylion o Swansea/Cork Ferry gan Stephen West. Golosg ar bapur, 183x122 cms, 2023.
Credyd Delwedd: Dewi Tannatt Lloyd
Blog Post
Gall hwn fod yn freuddwyd
Mae Stephen West yn artist sydd wedi byw a gweithio yng nghefn gwlad canolbarth Cymru am bron i bedwar degawd, ac fe lansiodd ei arddangosfa ddiweddaraf, Finding Sea Level, yn Oriel Mission yn Abertawe ddydd Sadwrn, 11 Mawrth.
Mae’r arddangosfa’n cynnwys lluniau mawr gan Stephen, sy’n cael eu gosod i greu dilyniant o ddelweddau dramatig, pob un yn naratif ond heb adrodd stori.
Mae gwaith Stephen yn cyd-fynd yn berffaith â phensaernïaeth yr oriel ac mae’n cyd-fynd â’i hanes fel Cenhadaeth Anenwadol i Forwyr ar lan y môr. Mae lleoliad yn dylanwadu’n sylweddol ar ei gelf, gan symud o gymoedd a bryniau yng nghanolbarth Cymru i bresenoldeb y môr mewn arddangosfeydd glan môr.
Yng ngeiriau Stephen ei hun, mae’r corff hwn o waith “yn ymateb i ddangos fy ngwaith yn Abertawe yn ogystal â mynnu’r gred bod y môr yn mynd i siapio ein bywydau fwy a mwy wrth i’r newid yn yr hinsawdd ddwysáu dros y deng mlynedd nesaf.” Felly, mae gwreiddiau’r arddangosfa hon yng nghanol cefn gwlad Cymru ond mae’n dychmygu am fod tuag at ymyl y môr.
Cynhaliodd Oriel Mission Sesiwn Sgwrs wrth Gerdded gyda Stephen West ar 25 Mawrth, a oedd yn gwahodd ymwelwyr i fynd ar daith o amgylch yr arddangosfa. I'r rhai na ddaeth i’r digwyddiad, mae'r recordiad llawn o'r Sesiwn Sgwrs wrth Gerdded ar gael ar sianel Vimeo Oriel Mission.
Denodd y digwyddiad hwn lawer o ymwelwyr, gan gynnwys y cyflwynydd teledu Cymraeg, Siân Lloyd.
Yn ystod gwyliau’r Pasg, cawsom rai penwythnosau prysur yn y man arddangos gyda grŵp Cynradd Criw Celf a gymerodd ran mewn gweithdy stensiliau. Cynhaliwyd y gweithdy hwn gan yr artistiaid Melissa Rodrigues a Joel Morris.
Arweiniodd yr artist Lewis Prosser weithdy i oedolion hefyd, lle bu’n dysgu technegau allweddol ar gyfer gwneud basgedi helyg traddodiadol. Does dim byd tebyg i wneud celf mewn ystafell sy’n llawn celf gwych!
Rydyn ni hefyd wedi bod yn annog ymwelwyr i weld a oedden nhw’n gallu gweld y creaduriaid a’r ffigurau sy’n byw yn ei ddarluniau. Mae rhagor o wybodaeth ynglŷn â pham y cafodd delweddau a symbolau penodol eu cynnwys yn ei luniadau ar gael yn y Sesiwn Sgwrs wrth Gerdded gyda Stephen.
Er enghraifft, yn ystod y Sesiwn Sgwrs wrth Gerdded, dywed “Rwy’n aml yn rhoi cŵn yn y lluniau. Mae’r ci ei hun yn hanner symbol o’r byd naturiol ond mae hefyd yn gallu cyfleu bodau dynol oherwydd bod cŵn wedi’u dofi; maen nhw’n ffrindiau i ni, maen nhw’n byw yn ein tai, ond dydyn nhw ddim o reidrwydd yn cyd-fynd yn dda iawn â bodolaeth ddynol, maen nhw’n gallu bod yn aflonyddgar.”
Efallai mai dyma un o’r ffyrdd niferus y mae Stephen yn creu cysylltiadau rhwng y modd y mae newid yn yr hinsawdd yn tarfu ar yr amgylchedd a sut y mae rhai o’r symbolau hyn yn portreadu tarfu.
Mae Stephen yn crynhoi pwrpas ei arddangosfa drwy ddweud “wrth symud y gwaith i Oriel Mission, rydw i wrthi’n dod o hyd i lefel y môr.”
Mae Oriel Mission yn annog unrhyw un sy’n mwynhau celf i ymweld â’r arddangosfa a phrofi gweledigaeth artistig Stephen yn bersonol. Cynhelir yr arddangosfa tan ddydd Sadwrn 13 Mai 2023.
Cliciwch yma i ddarllen datganiad llawn Stephen West i’r artistiaid.
Erthygl y blog a gyflwynwyd ar 29/04/2023
Ysgrifennwyd gan Lucy Anna Howson
